نجع الريم اليوم صدو لظهرة
سواڨين نجوعهم شور الغاسول
خمالين عوينهم ليلة قمرة
ومهاريهم ذاك بارك ذا معڨول
ويحي يانا على المحاين كي تصرا
وتجيني مترادفة رملة و جبول
قلبي يتكوى على صهد الجمرة
حارم نوم العين والخاطرمعلول
نشرب دمع محايني قطرة قطرة
يحرق شفري على خدودي دار سيول
موالف نشوف ولفي على بكرة
كان يجيني صباحها ولفى معسول
هاهم راحو بقاتلي غير الجرة
وانايا في مراحهم بقيت نجول
ياهل ترى مشاو بيها لصحرا
وياهل ترى شورو بيها لتلول
نبكي وحدي لا حنين ولا نعرة
يونسني بحديث صافيت المفتول
نتبع في مريرهم جرة جرة
ومن زهري حتى صمي دار ضلول
لا هاتف من شورهم جاني ندرة
ولا مرسول الدارڨة جاني معجول
يا ويحي زادوعلى جرحي ذرة
يوم اداو الريم بزغارت و طبول
بالصحة راكي هنيتي يا عذرة
ويحي غير انا الي باقي مهبول
حطيتك في جنتي درتك زهرة
وسقيتك بلحب حتى دار سيول
باغي في مدراستك نرجع نقرا
ونطمع في محبتك تبقالي لطول
نتفكر سهرات و ليالي قمرة
نتفكر ضحكات طب لي معلول
نتفكر ذوك المراسم و نظرة
نتفكر حتى لجرة ويين تجول
الله لا لي رفيق عندو سيارة
نزورو ولفي نبرد القلب المدبول
ياترى فرحيل راكي صبارة
ولا قلبك كي قليبي راه يقول
ولا نسيتني خلاص حبي والذكرى
وسمي من ذكيرتك تمحى طول
11/12/2020
بقلــــ Brahim Bouzaidaـــم
