و درقت القصبة و رقصت العلاوي
و درق البرنوس الي كان يقمن
و درق الراي من احمد وهبي و بلاوي
و ضحات الهامة تلقط و تلحن
كي راحو البراحة و راحو صحاب القناوي
صبحت الساحة لسواقت عن و عن
و الفرنات ماكاش و الراس خاوي
بانت القوبع و الضريس اقرن
نعقل انا صغير بوضويو الضاوي
و لى الكلام الطايح عندو وزن
كي قلت الصح داروني شاوي
انا مانيش شاعر غير متمحن
نعرف واش نقول ماشي فالقهاوي
انا قندوز المشياخة و الملحون فيا سكن
نسمع غنى المشياخة حتى قانا المغناوي
و لي ماعجبوش يقدم و يبين و يبرهن
الحمد لله في وسط الشعراء ساوي
نقول و نقول سارح في ذاتي و ندندن
قالها احمد بزيان بخرو بالجاوي
ما نجمعو الرخاس و لا المرعن
نجمعو صحاب الكلمة و لي تداوي
امضاء الشاعر ع. بوجلطية
شرح بعض الكلمات...القوبع نوع من الطيور
الضريس...نوع من الطيور
اقرن ...يعني تنرفز
احمد وهبي مطرب الله يرحمو
بلاوي ..مطرب الله يرحمو
الهامة ...هي البومة
بوضويو ...حشرة
قانا المغناوي ..مطرب و موسيقي
سارح...يعني اعيش مع نفسي
ندندن ..هو وزن معروف في الصحراء لوزن القصيدة
الجاوي ...هو بخور معروف في العالم العربي
المرعن ...هم الرعاع
الرخاس ...يعني الحثالة و اشباه الرجال
ليست هناك تعليقات:
إرسال تعليق