ميراد قلبي
دلال ميراد قلبي راكي عذبتيه
منك ساقية الشوق عسل حلاها
ملكتي ذا قلب العطشان ارويتيه
وسال شوق حبك جواجي ملاها
كحلة العين عقلي شارد فززتيه
وباقي تايه في ذا لبرور كساها
لفيتيني بالعشق سمايا ضويتيه
شعلتي مصباح نجوم لقمر معاها
ما طقت نحارب شيطاني غلبتيه
لهوثتي لي عقار جنيتك و دواها
اسكنتي لي لنفاس تحرڨ قويتيه
قولو لها عشرتي في الكبدة مأواها
موحال ذا القلب ينسى الى نسيتيه
زفرات عشقك في صدري مقواها
تدي وتجيب من ميرادك اسقيتيه
كي نوصف دلال تتوهج بضواها
يتفتح الورد اليابس نظرة تحييه
يخضار عرفو تلقى عليه بملقاها
تتنابى ليه طيور تغني له تزهيه
يتراقص ليها فرحان من نشواها
ياطفلة وعلاه معشوقك تنسيه
تساليني حسيفة ولى هاك سواها
كانهو دين قديم مكر فيا اخلصتيه
عذبتيني بفراقك كي قلبي بغاها
شرحتيلي قلب المحبة و ملحتيه
خليتي جراح العشق تبكي هواها
ملح العشق الى زاد قلبي فتتيه
وتنفط في قلبي من حب بهاها
تنهادي يتخبط ف صدري بليتيه
تتمحمح شهقاتي بحمل شقاها
ولات ظلمات ليل كفني لمدتيه
صليتي صلاة لعزا لمحبة دفناها
عزوني في شوق قلبي راكي دفنتيه
وسط زنقات العشق سكنيه تياها
باسين نصرالدين
