ياطفلة...
ياطفلة الى كان قلبي واعدتيه
يحزم مرحولو يجي فالوعد باكر
يمشي لمرسم حبنا فارح تـلاقيه
يطفيلي الجمرات ف قلبي تـناڨر
هايم بخيالك قـبل لانوصل لـيه
محنتي ڨادي داخلي لفيح سامر
ياطفلة لاتكوني سبتي فذا التيه
تبقالي كية نصبح من حبك نافر.
دلال بحبك ناصر انتي ضيعتيه
قتلو الـشوق فـناه لا طاڨ يعافر
يجاهد فالصبر والصبر قا يعييه
فتت منو الـجوارح ڨاع تـتساكر
سكران برحيق حبك قلبي ماليه
دمرني الشوق بيه هامل وحاير
جنك راه فالعقل عاشر مـساميه
لا يخطيني هوض مني المشاعر
انـتي سبة ڨـلبي نـيرانك تـصليه
راكي كـويتي قلبي بنفخ مجامر
نبكي لـحبي نزيد للعاشق نـبكيه
و نحي وسطو بركان كـان غــاير
ياحليل للي صابر ع حبو يخطيه
تفتحي قلبي اسمك منو يتڨاطر
و تلقايه مـحاوط بنقشو مواتيه
حتى ڨـلبك كـان موسوم بناصر
واليوم ظني خاب بعدن هملتيه
درتي للڨلب وشمة تدمي بمراير
نافط جـرحي من حبك لا ننسيه
دلال سباب هلاكي جرحها غـاير
موس فراڨها و الزمان ليا مضيه
مهند كي السيف في ضـربو باتـر
فطمتيني م حبك صغير فطمتيه
ملكني خيالها هوداس فيه نعافر
ساهر ليلي نعد نجوم نخايل فيه
مرة نـشوفو بين نـجمات مـجاور
مرات بين كبكبات سحب تـخبيه
ذا الخيال ولالي فـالعقل معاشــر
نهترف بدلال حتى نومي مـعييه
كلي مل من تڨلابي وفراشي ناكر
ماصبت دوا غير دلال هـي تبريه
لعل حبها يتنسى ندفنو فـمطامر
نبني ليه صور ونزيد عليها نعليه
يبقالي حبها صيفة ذكرى للـذاكر
يتهنى ڨلبي يدس سرو ويمحيه
تطفى جمرتها يصبح هواها عابر
والا حتى للموت حبي معايا نديه
يعملوه بعدي قلعة للعشاق تتزاور
يولي قلعة فالبر الخالي تعمر بيه
يزاود برك بالعشق يـصبح عـامر
باسين نصرالدين
