بهذه المناسبة الطيبة اليوم الوطني للشهيد 18فيبراير
وددت أن اطلعطكم على قصيدتي هذه المتواضعة رايجيا أن أن تنال إعجابكم ..
والتي اقول في مطلعها ...
...........قرن عريف .....
ياباكي حب الوطن وقت الذكرى
متحمس في حالتك حرقة وعناد
محبتة وطنك يابني ماهي هدرة
ولا قصيدة يطربك بيها قصاد
بغوايط وطبول ونواع الحظرة
ومشاوير يغظبو فيها لعياد
حب اوطانك في المسرة الضرة
ووقت الشدة والرخاء دويام طار
في العسر مع اليسر حلو ومرة.
خاوا خاوا دايمن ضد الحساد .
واذا تحدو خاوتك زادو نعرة
ذاك اليوم تصيبهم في الصف وكاد.
عكشها ياصاحبي بوڨندورة.
وزيد عمامة لفها شلات وكاد.
وبرانس متخالة صوف وبرة
سروال عرب ذاك ملبوس لجداد.
وتحزم تحت الضلوع بسنتورة.
وجبيرة فيها العدة والعتاد
فيها ماتحتاج زاد وذخيرة.
وزويجة وسريرها يلمع وقاد
وضرب صدرك قول انا ولد الصحراء
وعلى النيف تجي غواشينا هداد
في جال المضلوم نعمل مجزرة
وعلى الذل نفضلو سكنة للحاد
بصمة في التاريخ تبقى محفورة
تتباشر بيها الأحفاد ولولاد..
سال ظهور الخيل تحكي واش صرا
من قبل الأمير خالد والمقداد
بطل الموقامة ناصر بن شهرة
وشريف الي شوايعو في كل بلاد
بوشوشة الي ڨال دولتنا صخرة
والي طيح عليه تكسرلو العضاد
الي طاح على برنا يدي نڨرة
وياويح الي قاصدو عنوة وعناد
أيس مايبقاش ثار ولا جرة
ووطنا نحموه بالشفرة وزناد
سال الونشريس وجبال الظهرة
وسال الڨعدة ذيك ڨطاعة لوهاد
الصمة وشوابير لينا مفخرة
والخطيفة ذيك خطافة لوغاد
تشهد بخصالنا الشجرة والحجرة
وحمايد ومروتها وسيول الواد
سولهم محال يخفولك هدرة
يحكولك ويقولك كانو رواد
ودار الحال على رجالي ياحصرا.
ولامن قال نريدهم يبقاو اسياد
لامن قال قبيل كانولي نعرى
ولا من قال خصالهم لابد تتعاد
والله قالب ذي الدنيا دواره
طمست قع نيوفها وضحات اضداد
الزعيم اليوم تلقاه البرا
والذلالا جالسة خلف القياد .
------- توقيع الشاعر الجزائري يوسف كرعي يوم 2024/02/18
ولاية جبال عمور افلو ..
الصورة معلم تذكاري لمعركة الشوابير بجبال عمور ..
ليست هناك تعليقات:
إرسال تعليق