محاورة بين حرف (س) و حرف (ش) .. للشاعر الدكتور علي مسلم عجمي
--------------------------------------------------
ما بين سين و شين سجلنا حوار
و كل حـرف قـدم للمعـاني إعتبار
و ما بين أخذ و رد في لمحاورة
للنتيجـة مـا قـدرت آخـذ قـرار
س..
ساعة سَمَر كل السعادة بتعتبر
سلة سرور محملة بأشهى ثمر
بتلات نقط عالسين بتلاقي شرور
يا شين شرِّك شَغَّل شرار البشر
ش.. شمعة شعاعي نور عالعالم سطع
بتلات نقط تبديل عالسمعة طبع
الشمعة بتحرق نفسها تبيد الظلام
لكن السمعة السيئة سوء الطبع
س.. ساكن و ساجد في سكوني بالسلام
سر أسراري و سلطاني الهيام
السر زاد 3 نقط بالشر عام
شد سد الحابس نفوس اللئام
و شينك الشيطان ع سكوني افترى
و شو بعد يا شين الشراهة و الخصام
ش.. شاعر و شِعري شعور صوبو شَدّني
شعاع شوقي بالشجاعة مدّني
يا سين سينك شدني أو سدّني
سينك يا سين السحر صعبة يصدّني
من شفافها شهد اللي بيداوي القلوب
شوف الشعب بالشكر شو بيعدني
س ..سمرا بسماري الشعر يا شين ارتجل
كرامة سماري بالفصيح و من زجل
يا شين شمسك من عدا سين السما
ما بتطلع و بيصيبها سهـم الأجــل
ش ..شراعي بحرف الشين بيمشي اليخوت
شامة عخد الشُقر و بنـات البيـــوت
الشين شبكة السين سمكة بقلبها
خليك عالق بالشبك حتى تمــوت
س ..السين خلّا شمسك شعاعا سطـع
الأذن لولا السين ما جـاهـا سمع
سلاحي و حرف السين ربحوا المعركة
استسلم عدوّي و سقط عالربك ركع
ش ..السهرة بلا شُهرة و شموع مشكشكي
سُفرة سفرجل عالسطيحة مسبـّكـي
بالشين شاعر بالشهامة و الشعور
مش سين سـم و سهـم بيسبب بِكِي
س .. سِلِم و سلام السين سادات البشر
و 3 نقــط عالسر بالشـر انتشر
بالسين فيك تقولها عـامك سعيد
مباركة عليكي السنة يا سين الدرر
ش ..شين الشرايــع شرّعــت شاشاتها
شهدت لهـا الساحـات عشهـاداتها
شَعر الصبية الليل لونو مـاخـذو
و اسْوَد لمـا استـأسدوا ساداتها
س ..سلسال ساعتها سلالة سامقـة
سواعِد سليمة ساعدتهـا ساحقة
سِحرها سَلَّـط سلاطينو سْهام
ساحـاتهـا سبقِـت سواعد سابقة
ش ..شاف شقرا شمال شباكي شاويش
شرعتلو شفافها شقت شاليش
شالها شفاف شرنقتو شعاع
شكلو شكل شلال شمعاتو شواكيش
سين شين نجـوم متـل الفرقدين
شوفة سعادة بشوف فيها العينتين
كل حرف عنـدو إختصـاصـو بالكلام
و مستحيل التفرقة بين التـنـيـن
الشاعر د. علي مسلم عجمي
لبنان
