بير المحبة
ماتصحبنيش على صلاحك
طموحي مايخدمش طماعك
مافي عقلي ماهو في عقلك
صحبة المصالح عرفناها
الصحبة رفد مني نرفد منك
هز ثقالي و نهز ثقالك
تحسن عواني و نحسن عونك
هكذا ولا خلينا منها
ثقتي مايهزهاش شيطانك
شيطان الإنس هالك
ضحك المصالح بين نيابك
وصاف محبتك قريناها
لا تشوفنيش منجي سفينتك
البحر ماهو بيدي لا بيدك
ياصاحبي نيتك مجذافك
طوق نجاتك في وسطها
يدي ماهي هراوا لفاسك
ولا هي حبل على رقبتك
ماهي ثمرة في جنانك
وقت ماتبانلك تقطفها
خليك عاقل في جماعتك
محبة الله في محبتك
اليوم عندي غدا عندك
تخضار وطيب ثمرتها
من بير المحبة دي نبعك
بيه سقي روي جنتك
حافظ على مجراه ينفعك
نبتة الطيب سجيها
بقلمي
أوسيف قدور
ليست هناك تعليقات:
إرسال تعليق