النفس الامارة بالسوء
يا نفسي نتفاوضو واش جنيتي
في ذالدنيا واش من فوز كسبتيه
ارواحي نتحاسبو واش فيادتي
وينا سوق لي انتيا ربحتي فيه
العبتي وشحال بعتي وشريتي
لا فايدة لا راس مالك شديتيه
يا نفسي الشيطان قرك ماتبتي
مانعلتي الشيطان مرة وعصيتيه
راكي تعبتي في طريقو ودهشتي
فعل السوء ديما انتيا تجري ليه
الخدعة بلا. جنحان ليها فرفرتي
وكلام التقطاع راكي وصلتيه
مادرتيش الخير فا الناس شفعتي
ماسعيتي في جمع شمل ولميتيه
تعديتي على الناس وشحال ضلمتي
ماغاضك مضلوم بدمعة بكيتيه
ما اديتي حق ربي زكيتي
مارحبتي بضيف ربي وكرمتيه
للامانة خاينة ماحافضتي
ماشفك عريان بارد دفيتيه
يا نفسي راكي عييتي وشقيتي
ماطعمتي جيعان خاوي شبعتيه
ماجالستي شيوخ معاهم جمعتي
ماسمعتي لحديثهم تمعنتي فيه
لا حكمة لا صدق منهم تعلمتي
مافتحتيش كتاب مصحف وقريتيه
يانفسي يا هاملة كثير طغيتي
مأثر فيك خوف ربي ماطعتيه
نداء الاذان عليه طرشتي
ما دخلتي مسجد ماصليتي فيه
فيقي يانفسي راكي تزلبحتي
كم من واحد من حبابك ادفنتيه
تبعتك لباب الندم ماحنيتي
حتى رايي يا العرة تلفتتيه
في واد الكشفة عليا سديتي
وباب الخير راكي عليا بلعتيه
عليا كل االناس راكي ضحكتي
وعوز الوالي علاه فيا شفيتيه
في شخصي بالسوء راكي عايرتي
وقلتي فيا كلام عمري مانشتيه
وتحبي لحرام فيه تشهيتي
ورزق الناس لناس وانتي طمعتي فيه
لعب الفاني بيك فالعمق غرقتي
وسمح فيك لي درتي الدرك عليه
ماندمتي على عمالك وحشمتي
مانعلتي شيطان ماقلتي نخطيه
من الجيفة راكي كليتي وشبعتي
هذي رشوة وذا ربى تمتعتي ببيه
حتى في الذمم راكي تاجرتي
في لحم العباد واش من بنة فيه
والفقير شحال بيه ستهزيتي
ماغاضك مسكين بحاجة فرحتيه
ماغاضك منكوب لامن انقذتي
لا هادم عندو ليتامى زوجتيه
ماضميتي يتيم على الراس مسحتي
ماحنيتي با للطافة سولتيهه
شحال سهرتي مع الرذايل طولتي
وعند الفجر يجي النوم مع قاشيه
ولعبتي بالمال ياما بذرتي
ونفقتيه في طريق شينة ذليتيه
مابنيتي بيه ساس ليك وعليتي
ماحفرتي بيه بير للعاطش يرويه
لا جمعية قال فيها ساهمتي
ماشفك مريض من الدم عطيتيه
ما ساهمتي في المساجد شاركتي
ولا فرض من الفرايض اديتيه
لا عمرة لا حج بيه اطهرتي
وفي رمضان درتي السبة وكليتيه
ياويلك شحال في الدين عبثتي
وكي تطفر باه مولاك تلاقيه
تنتهي ليام حتما تموتي
ووجودك يزول كلي ماعشتيه
ذيك الحفرة واش ليها وجدتي
وضلام قبرك واش من نور يضويه
لازربية كي العادة تفرشتي
لازورة من صوف وتغطيتي بيه
بين حيطين من التراب تكسلتي
ومقطاك من الحجر وتراب مقطيه
وفاالسؤال اذا انتي ماجاوبتي
وتفقدي الثبات ماتشفاي عليه
وتشهد لعضاوات عنك ما درتي
ينفعك كاش خير بكري قدمتيه
يشهد رجلك وين رحتي ومشيتي
ولسانك فالناس واش هدرتي بيه
وتشهد عينك وين بيها ركزتي
وحتى نيفك واش كنتي تشمي بيه
ويدك لي بها سرقتي ونهبتي
واش كليتي في البطن وشربتي فيه
اذا تبتي قبل موتك وندمتي
ربي يرحم كل من توسل ليه
بين يديه اذا سجدتي وبكيتي
العمل الطالح يبددلو صالح يسويه
غسلك من الذنوب راكي تنقيتي
الرحمة والغفران والعفو يبقيه
وعلى خير الخلق راكي صليتي
وعليه السلام ويبارك عليه
يوم يقول يا لله اين امتي
غير المشرك ماتحق الشفاعة فيه
الشاعر لعجال بن يحي فجخي
قاصد بقولي كل من نفسو تقويه
