همسات
(نصيحه لما تحب ماتحبش أوي عشان لما تنصدم فى إلي بتحبه ما تتوجعش أوي) و ( البيت إلي ما فيهوش صايع حقه ضايع)
الجملتين دول بسمعهم كتير أوي اليومين دول يعني أيه يعني عشان أعيش يبقي لازم أتعامل مع الناس بعنف و كره يعني لازم أبقى بوشين لازم أقدم الشر لية
هو ليه بيقنا كده العيب فى مين فينا و لا فى الدنيا و لا فى الناس إلي حولينه
كل يوم بسأل و محدش يجاوب لما الأخ يقتل أخوه عشان الورث و أما الأبن يضرب أمه و أما الأب يغتصب بنته و أما الصاحب يخون صحبه يبقى العيب فى مين
أكيد العيب فينا الدنيا هى هى الشمس بتطلع بالنهار و القمر بيطلع بالليل آه يا زمن ملكش أمان
عشان كده بكتب روايتي الجديده و هى بعنوان ( أخ ) و على فكره الحكاية دي بقت بتحصل كل يوم
عارف يعني أيه يتكتب عليك تعاشر ناس و أنت مش عايز تشفهم أصلا لو صاحبك ممكن تنساه لو جار ممكن تسكن بعيد عنه
طيب و لو أقرب الناس ليك يبقى مغصوب عليك تعيش و تتحمل بجد حاجة صعبه أوي لكن ربنا يقوي
زمان كانوا بيقولوا الدم عمره ما يبقى ميه دلوقت بتلاقي الدم لما تتبرع أو تبيعه
و يا سلام على زمن سي السيد بجد كان زمن حلو كان الراجل بيأمر و الست تنفذ من غير كلام و مع ذلك كان بيحترم مراته أيوه كان بيحترمها لما كان ما يخرجهاش من البيت عشان خايف عليها و كمان ممنوع تقعد مع صحابه صحيح كان بيبقى صعب شويه لكن كان الزمان أحلى كان فى حب و صدق دلوقت بقى كله بيضحك على كله زمن الصحاب اتهد و أصبح زمن المصلحة هو إلي سايد
طيب ما تيجوا نعمل حاجه صح تعالوا نحاسب نفسنا كل ليله قبل ما ننام نشوف احنا عملنا أيه انهارده صح و نعمله كل يوم و أيه غلط ونصلحه يمكن نصلح ما أفسده الدهر
يا ساده الحرب دلوقت بقت حرب العقول مش حرب الأسلحة و للأسف الانترنت بيساعد على كده بسرعه و ده من سوء استخدامه من أجل ذلك أنشر روايتي هذه ربما تكون عبرة للجميع أتمنى أن تحوز على اعجاب الجميع
انتظروني قريبا فى ( أخ) تحياتي للجميع
الكاتبة / هناء البحيرى
