جيتك يا ليام بلحاني نعزف
نعزفلك هموم كبدة مقسومة
جيتك كاسر خاطري والدمع نشف
رافد كاس الجرح طعنة مسمومة
جيتك باكي قلب فيه الهم اعكف
متعنق غيمات صيفي مهمومة
صبتك مثلي هايمة جرحك ينزف
ساميتك وبكيت دمعة محتومة
صار الهم اثنين والهم ترادف
تتكاثف لضرار وتجي ملمومة
ضري شفتو خيط ظاهر وسط الكف
من عين العراف حكمة معلومة
شرحولي بتمام فسرهابالحرف
جاب حديث متين هدرة مفهومة
يشرحلي ويزيد فالقول ويحلف
اجراحك بالذات بانت مرسومة
قتلو يا عراف ذالدنيا تخطف
غدرتني ليام ساعة معدومة
حاصرنى ثعبانها صرت مكتف
ولدغنى بنياب ترهج مسمومة
ورماني في ليل من خوفو نرجف
غارق وسط فكار بالهم مردومة
دقق فيا زين لم يديه ونسف
وقرالي كلمات زينة مختومة
انت بيك غرام شوقو راه هدف
تحت رماد جمار لهبة محمومة
فسر قول العين بالمعنى وعرف
وعطاني فالعشق صيفة مذمومة
وشرحلي صدري بآية م المصحف
كاكاني بلي علينا محتومة
جيل يروح وجيل من بعدو يخلف
كذا ناس فنات ماتت ملطومة
قتلو يا عراف حضر جنك خف
عجلي بحديث نفسي مغمومة
راه الجرح يسيل بالحزن وينزف
بحر هوالي هاج موجة ملطومة
هامل عقلي بين اهمومو والحرف
بنت فكاري جات كلمة مهمومة
شاعر بريان عبدالقادر
