01-وحد اليوم يانسي خرجت صياد
وانا ماشي جبرت وحدة زين الغزال
02-شفتها و شافتني بيناتنا الواد
سلبني زينها دلشني ويطوع الرجال
03-خمسة وخموس عليها ما لحساد
بخزرتها غبنتني قاوي و شحال
04-زينها يفتن شرتلي العقل. وعاد
حالي مظطرب ياخوتي أركبني الهبال
05-بخزرتها في ڨلبي دڨت لوتاد
عينيها عظلم خطفوني ڨلبي مالْ
06-صابني رمح غرامها م لبعاد
خلات جروحي تهطل تهطال
07-كواتني مشهابها صهدني تصهاد
عاد خاطري مهــول تهــوال
08-مالمحنة و تفكار همومي تزداد
حملتني ما لهم حمال لجبال
09-غرامها مرضني رشالي لكباد
ملكني عقار حبها و صال
10-الله غالب رغبهالي الموراد
زينة المبسم مسرارة بنت الشمال
11-غزالة شلفية حرة بنت بلاد
مشيت شوار دارهم عليها سوال
12-أهلها طايڨين و ناس قيــاد
ڨالوا لي عندنا واش تسال؟
13-ڨلت لهم سلبتني بنتكم سُعاد
جيتكم نسيب و بغيتها للحلال
14-أعطوني الكلمة و عطوني الميعاد
مصعب حبها طاڨ عليا بالمُحال
15-حبها قهرني أثر فيــا و زاد
اشطني ياسر و عذابي طال
16-زينها. همَمْني وحرمْني ما لرڨاد
حصنو عوني وانا طوعني ذالجمال
17-سكنت لي الدم و سكنت الفؤاد
بحبها ضحيت كالواحل في لوحال (الطين)
18-ولات تهدفلي عند الوساد
خيالها ڨبالي ما يروح ما لبال
19-نقارع في خبارها عليا تنعاد
يهنى.. خاطري و نبرا م تعلال (المرض)
20-يصفى ڨلبي ماللغيم يزول السواد
خايف نكبر ذا لوردة تذبال
21-تطفى نيران حبي ترجع رماد
عشقتها ڨلب مانيشي مثـال
22-خايف يتالبوني فيها العباد
خيكم بسيط ماعندوش المال
23-نعيش حياتي اظلام حِداد
صبرت صبري فاض ما لمكيال
24-كلمتي رصاص يدي على زناد
نهديك رصاصتي خرجت سمعوها الخيال (ناس)
25-يالبنية مُحال نهجرك حتى للحاد (للقبر)
أنايا مـاني غدار ومـاني بدال
26-معدني ذهب وارثو مـا لجداد
الذهب يبقى ذهب عمرو ما حال
27-ڨالت لي لاهو لاهو يــالصـياد
28-ساعفني في حبي أصبر تنال
29-ياكاتب الحروف و حرف الضاد
أنتايا صبرك ما هوش... طـوال
30_تلبسني ثوب المواسم و لعياد
أحمد الشلف ڨلبي ليك و تستهال
الشاعر م.أحمد الشـلـف
