خبطوها لثنين عادو يترماو
من كنت أنا عزهم راهم ضدي
مارحمو سلطانهم فيه تحاماو
عينيا والقلب هذو هم قصدي
طعنو وسط رماد فيه وما سماو
هاهم سرحو ذرك هاواش نهدي
صدو بيا للوعر شرد و دواو
لهبت نار الشوق في جوفي تڨدي
صهد النار وحر ذالزين تلقاو
ق زيدي لعذاب هافيهم زيدي
راهو ضركا لحق فيهم يتعزاو
صاحي جوي كان وتهلك رعدي
وطاحت عنو مزون ورياح تقواو
ها شوفو ذزين كي طيح عمدي
راهم تحت ضلوع بسمه يتحجاو
سكرو من عينيه والهمس مندي
بالزين المڨدود والبسمة حلّاو
عادتلي بخبالها واش نسدي
ملي شفت الزين ذو لجراح دماو
من بعد سقيت الجنان ذبل وردي
راسو في لرض والعروڨ الفوڨ جباو
ماهو مضاري سيف يغدا من يدي
تعبني وجيوش عندي كيف سهاو
قايد جيشي طاع سلم ياوعدي
ملي شاف عيونها عينيه عماو
من بعدك خلاص ذ القلب مرندي
صام على الخودات والعينين رواو
عقلي سارح ودموع على خدي
ما طقتش لعذابها لعضاد عياو
حتى راني قريب نخرج من جلدي
ماباقي فيا صبر لعظام رشاو
جني طاع لجنها وقصر جهدي
قلت لعديان الهوى روحو تقراو
بـ✍️ Brahim Bouzaida ✍️
13/01/2023
ليست هناك تعليقات:
إرسال تعليق