** سَاعَفْنِي يَا ﭬَـلْبْ **
01 – سَاعْفْنِـي يَـا ﭬَـلْبْ كِـي حَكْمَتْ لَقْدَارْ
** وَنْسَالِـــي مَـــا فَـاتْ مَـــــنْ دَهَّـــرْ كْوَانِي
02 – اّلوَقْـتْ لِــي رَاحْ مَا بْقَـى غِي تَذْكَارْ
** وَيَا سَعْــــدْ لِــي عَـاشْ فِّـــي اّلدَنْيَا هَانِي
03 – اّلدَنْيَـــا مَــــنْ شَاوْهـَــا شَرَابّـةْ لَمْرَارْ
** مَكْتُوبَــــــــــــهْ لَقْــــدَارْ مَنَــــــــكْ هْدَانِي
04 – سَاعَّفْنِـي يَـا ﭬَـلْبْ مَــا تَبْقَـى مَحْتَارْ
** دَاوِيلِــي ذَ اّلجُــــرْحْ وَلَا تْـﭬُــولْ عْصَانِي
05 – لَا تَحْيَيـــشْ جْـــرَاحْ وَكْتَمْلِـي لَسْرَارْ
** جُرْحِــي هَـــِذي سْنِيــنْ عَنُـــــو مَتْغَانِي
06 – يَا طَالَـبْ مَا دْرَيـّتْ فَسَـــرْ لِي لَخْبَارْ
** نْعِيــدْ عْلِيـكْ هْمُـــومْ ﭬَــلْبِـــــي وَحْزَانِي
07 – يَا طَالَـبْ حَسَيْــتْ فِـي ﭬَلْبِي مَزْهَارْ
** ﭬَــادِي فِيَــــا نَـــــــارْ عَشْقِــــي وَكْوَانِي
08 – يَا طَالّــبْ نْسيـتْ رُوحِـــي وَلِي جَارْ
** وَسَاكَنِـــي طَيْــــــــفْ وَلْفِــــــي مَـﭬْوَانِي
09 – سَهَرْنِــــي لَيْــلاَتْ النَـــوْم عْلَيَا طَارْ
** وِاذَا عَـــدّتْ عْلِيـــــــــكْ زَادَتْ مْحَانِي
10 – وِاذَا انْــتَ حَكِيــمْ ظَهَرْ لِــــي لَسْرَارْ
** مَــــــــــا بَيْــنْ اّلبَيْنِيــنْ ضُـــــرْهَا عَيَانِي
11 –يَــا خَاوْتِـي هَـذَا طَالّــبْ مَنْ اّلشُطَارْ
** مَتْسَلَـــــحْ بَسْــــلاَحْ نَجَـــــــــمْ شَيْطَانِي
12 – خَلِينِـــي مَسْتُــــورْ لَا تْعِيـدْ لَلْحُضَارْ
** كَلَمْنـِــــــــي بَرْمُـــــوزْ نَفُهَــــــــمْ لَمْعَانِي
13 – ﭬَـالْ دْوَاكْ صْعِـــيبْ يَامَـا فِيهْ خْطَارْ
** وَﭬْـلَيْبَــــــــكْ هُــوَ طْبِيبَــــــــــكْ حَقَانِي
14 – أَنْـــتَ بِيـــكْ غْـرَامْ ﭬَـصَافّــــتْ لَعْمَارْ
** سَلَابَّــــتْ عْقُــــولْ مَـــــــنْ كَانُــــو هَانِي
15 – يَا رِيمَــــتْ لَرْيَـــــامْ يَا كَحْلَــةْ لَشْفَارْ
** مَــــنْ حُبَــكْ يَــا زَيّــنْ ضُـــرِي دَخْلَانِي
16 – يَــا وَلْفِـي مَـا فَــادْ فِــي فْرَاقَكْ عَقَارْ
** لَا طَالَّـــــــبْ لَا طْبِيــبْ خَفَــــــفْ حْزَانِي
17 – يَـــا وَلْفِـــي مَعَـــادْ غِي ﭬَلْيبِي صَبَارْ
** نْطِيـرْ مْـــعَ لَطْيَــارْ نْشُوفَــــكْ بَعْيَانِي
18– يـَا شَطَانْتْ خَاطْرِي مَا دْرَيّتْ لِي صَارْ
** نَتْصَبَــــحْ صْبَــــاحْ خْيَالَـــــــــكْ مَسَانِي
19 – سَاكْنْلِــي فِّـي اّلجَــوْفْ خَبَلِـي لَفْكَارْ
** مَـــــــاهُــو طَالَـــبْ شَوْقْ طَالَبْ حْزَانِي
20 – رَايْدْلِــــــي الدَمَـــارْ دَمَرْنِـــــي تَدْمَارْ
** حَابَسْنِــي فِّـــــي هْــــوَاهْ بَلَــــــعْ بِيبَانِي
21 – أَمْرَكَـــــبْ مَشْعَــــالْ زَاهَــرْ فِيهْ النَارْ
** وَكْوَانِــي كَيَـــــــــاتْ مَازَلْــــــــــتْ نْعَانِي
22 – يُضْـــرَبْ ضَــرْبْ بْرَﭫْ كِي لَوَحْ شْرَارْ
** وَسْـــــــطْ اّلـﭬَــلْـــبْ وْزَادْ جُرْحُــو عَيَانِي
23 – زَادَتْلُـــــو لَعْــــلَالْ دَارْ اّلوَقْـــتْ وْدَارْ
** وْيَــــــــــا حْلِيـــــلْ لِـــي رَاهْ مَــزَالْ يْعَانِي
24 – لاَهْ نْبَــــارزْ حُــــبْ وْمَـــــا عَنْدِي نَعَارْ
** لَا صَاحَــــــــــبْ نْفَــــعْ لَا صُغْـــــرْ فْدَانِي
25 – صَبْرِي فَاتْ اّلصَبْرْ وْكِــي رَانِي صَبَارْ
** سَلَمْـــــــــــتْ سْلَاحِــــــي مَنْهَـــا بَرْكَانِي
26 – سَيَافَــــكْ يَــا رِيــــمْ مَتْعَنْتَـــرْ جَبَارْ
** مَـــــــــــا تَبْكِيلُـــو عَيْـنْ ثْرَنْتُــو عَدْوَانِي
27 – كَتْفْنِـــــــي بَكْتَـــافْ شَرَبْنِـــي لَمْرَارْ
** نَــــــــــــــدَاهْ اّلمَكْتُـــــوبْ طَايَـعْ وْجَانِي
28 – ذَا بَحّــــرْ اّلغَــــرَامْ هَيَجْلِــــي لَضْرَارْ
** نَتْلَطَــــــــمْ لَمْــــــــوَاجْ ذَ اّلمَـــوُجْ رْمَانِي
29 – مَالِــــي حِيلَـــــهْ لِيـهْ ذَ اّلبَحّرْ اّلغَدَارْ
** وَرْمَانِـــــــــــــــي فِّـــي وَادْ رَاحْ وْخَلَانِي
30 – لَا تْلُومُونِي يَا لَحْبَابْ وَلْــﭬُولِي لَعْذَارْ
** وَلِـــــي مَا يَعْـــرَفْ غْــرَامْ جُرْحُـو بَرَانِي
31 – لَا يَنْصَحْنِــي ذَاكْ لِـــــي جَانِي دَبَارْ
** دِيــــــــــرْ مْزِيَـــهْ يَــاكْ أَسْكُـــتْ وَهْدَانِي
32 – لِي مَا سْهَرْشْ الّلِيْلْوكِي طَلْعَتْ لَفْجَارْ
** مَـــــــا يَعْـــــــرَفْ غْـرَامْ شَهْلَــتْ لَعْيَانِي
33 – مَـا شَارَبْ مَنْ كَاسْ مَاَ ضايـَﭫْ لَمْرَارْ
** مَـا يَفْهَــمْ مَعْنَـــــاهَ ... جَنُـــــو رَوْحَانِي
34 – عَيَيْتْنِـــي يَـا ﭬَــــلْبْ دْعَيْتَــكْ لّلغَفَارْ
** طَفِــــــي ذَ اّلجَمْـــــــرَهْ وَخَلِينِــــي هَانِي
35 – سُبْحَــــــانْ اّلمَعْبُــــودْ لَمْقَــدَرْ لَقْدَارْ
** وَاّلمَكْتُوبَــــــــهْ ﭬَـــــاعْ تَلْحَــﭬْنِـــي ثَانِي
36 – بَحْـرْ اّلحُـبْ صْعِيـبْ يَامَا فِيهْ خْطَارْ
** سَـــــالْ مْجَــــرَبْ يَــاكْ كَاسُـــو وَسْقَانِي
37 – مَـا نْفَــعْ فِيهْ طْبِيــبْ لَا طَالَبْ عَقَارْ
** لَا دَمْعَـــــــــهْ تَبْرِيـــهْ سَالَـــــتْ وِيدَانِي
38 – شَبْرْ مَــنْ اّلتُرَابْ مَرْصُوصَهْ لَحْجَارْ
** هَانِـي صُبْــتْ دْوَاهْ .... يَـا اّلسَامَــعْ رَانِي
39 – نَظَمْـــتْ اّلمَنْظُـــومْ بَاّلـﭬَوُلْ وْلَشْعَارْ
** يَــــــــا اّلسَايَــــلْ عْلِيـــهْ وَفْهَــمْ لَمْعَانِي
40 – دَاعِي لـَـــكْ يَـــا لله تَبْرِيلُـــــو لَضْرَارْ
** وْلَا تَهْــــدَى مَمْحُـونْ ﭬْـلِيبُـــــــو وَحْدَانِي
41 – ذَا خُوكُــــمْ جَمَـــالْ فِــي ﭬَلْبُو أَسْرَارْ
** لَا مَـــــنْ دَارِي بِيــــــــهْ رِيحُـــــــو رَبَانِي
42 – اّلحَمْـــــدُ لله عْلَـــى مَا عْطَى وَخْتَارْ
** مْــــــــعَ شْرِيـــكَتْ لَعْمُـرْ كِـي رَانِي هَانِي
43 – ذِي بَنْــــتْ الّأُصُـــــولْ كَتَامَتْ لَسْرَارْ
** تَبْرِيلِــــــــــــي لَجْـــــــــرَاحْ دَوَاتْ حْزَانِي
44 – أَحْفَظْهَـــا يَا خَالْقِي مَــنْ كُـــلْ ضْرَارْ
** أُمَيْمَــــــــــــــــــةْ عُمَــــــــارْ قُــرَةْ عْيَانِي
45 – تَارِيـــخْ اّلمَنْظُــومْ سَطَرْتُــــو تَسْطَارْ
** فَاجَيْـتْ عْلَـى اّلـﭬَـــلْـبْ كِــي دَارْ زْمَانِي
46 – فِــــي اّلثَالَــثْ جْــوَانْ لِيكُمْ يَا حُظَارْ
** أَلْفَيْــــــــــــنْ وْعَشْرِيــــــنْ تَــمْ اّلغَيْوانِي
47 – وَنَخْتَــــمْ بَاّلصَلاَةْ عْلَـى شَــارَقْ لَنْوَارْ
** بّصَــــــلَاةْ عْلِيـــــهْ يَرْطَــــــــــابْ لْسَانِي
48 – بِيهَــــا مَتْعَــــــوَدْ نَخْتَــــمْ كُـلْ شْعَارْ
** أَلْــــفْ صْــلَاةْ عْلِيــهْ تَبْـــــــــرِي لَحْزَانِي
بلبل الصحراء
جمال جلالي : 2020/06/03
