01-مالك يازهري شايف الحق وساكت
ريتك تنصف بيناتنا بالحق وتتكلم
02-يازهري خليت الجياح عليا نتاصرت
وهـمتني ضحيتلي ك العدو
ظالم
03-شفت صابة جغدمت وسدرة هاجت
شفت العنزي تثمن و رخس الغنم
04-شفتك خليت الساڨية للكاليتوس دارت
ريتك تتعقل و تكون حكيم فاهم
05-سجرة الثمر خصها الما يبست
غلات الكرموس ولات بثمن تتساوم
06-الكيوي برد حمان سوڨها رخست
تحسر حالي وتغيظ مڨواني نخمم
07-الدنيا عافتني بالظهر ليا صدت
جراتني و مزالني نجري غيظي كاظم
08-ناس زيد فالبحر عيني شافت
يالبحر ذازهر ولا كتبة بالقلم
09-تسود سعدي حتى سلاسل تهتكت
زفروني لحباب وللي ليا مالدم
10-يازهر درڨتلي بالمكتوب حياتي مرارت
حالي تعلل مالفايدة وليت نتشأم
11-تسدت لبواب في وجهي دنيتي ظلامت
حالي حال لي يلقى فالكبدة العظم
12-دايما مغياظ همومي مالمكيال فاضت
يالخاين بيا غدرت عَيَٓشْتني فالوهم
13- شحال من حجلة بين يديا طارت
خـُنتني يالخاين شافوني قبيح مجرم
14-بيا غريت راك فيا تشمت
وليت تحضن لعوج و تعيف المسڨم
15 تالبـتني حتى في فكاري راحت
وصلتني للواد رجعتني عطشان صايم
16-عند الـعُكلي تتحزم و عندي أرڨدت
ظنيتك أنتايا تكره الرقبة القايم
17-درت الفتنة فالبيوت الدم تشتت
واحد تسقيه بالعسل ولُخر بالسم
18-عيطة ناس بزعافك نـتاحرت
بسبابك يالخاين ناس عادت تجرم
19-سميتك عند طالب و الڨزانة شاعت
غلات سومتك الجُهال شْراوك بدراهم
20-عليا راك قسيت وكثرْتْ
عليك ڨلبي ماتغشش أمغيم
21-رانـي شكيت بـك لله وطلبت
ليا تصد وتحن معايا تتبسم
22-أحمد الشلف كلامي ختمت
بصلاة وسلام على ابو القاسم
الشاعر م.أحـمــد قـــلــم الـتــل
ليست هناك تعليقات:
إرسال تعليق