..........واقع معاش لم تنشر من قبل .........
--------------------------
*** حبك ( فُلانة ) ***
-------------------------
01 – حبــك ( فُلانة ) مـا طڨــتش ننسـاه
** ساكنلي فـي الدم والعظم مرشيـــه
02 – سـال علـى الزيتــــون كثرنا ممشاه
** في جنـب الرايــا والڨلــب ڨسمتيه
03 – وفــي الدار البيضا شطـاو وعشرناه
** يشهــــد على ليـام لوكــان سألتيـــه
04 – حتى طريڨ النصـر خطوه وتركنــاه
** وبوخــرص بعيـد لا مـن داري بيـــه
05 – موعدنا عشـوه كـــل يـوم نستنـــاه
** تتلاقـــى لڨلـــوب وشــــوق داويــه
06 – سهران طول الليل صوتك وسمعناه
** كي ترجـع الـروح جسدي وحييتيه
07 – نغمــه فـــي وذنــي و النـوم نسيناه
** هايــم طول الليـل زينك متشهيـــه
08 – اسمك (فُلانة) فــي الڨـــلب نقشناه
** ما تمحيه سنين مـا يتنسـى ماضيه
09 – فاتت عشـره سنين يا لفاهــم معناه
** ثمنيـــه مـن لعوام راني زدت عليـه
10 – ڨلبــــي يتفكــر فـي حبـــك مڨواه
** ما تروحي من خاطرُ راكي عذبتيه
11 – جال وجال كثيــر متوحـــش ملقاه
** و كذا مـن نسـوان وشكـون يداويـه
12 – من جرحك محال نبــرى يا حصراه
** ميـت وانا حـي لا مــن سـال عليــه
13 – يا بنيــــت العڨبــان زينك وعشقناه
** صغـــري وشبابـــي فنيتــه لهيــــه
14 – راني اليوم بعيــــــد متشــوق نلقاه
** نظــره مـن عينــي (فُلانة) تبريـــه
15 – ندعيــلـــك يا رب شكــــويـــــــا لله
** تبري هــذا الڨلب ومن حبهـا تشفيه
16 – وتحفــــظ (فُلان) وليـــدي ما ننساه
** ساكنلـي فـي الـدم وريحتهـــا فيــه
17 – أتهـــدن يا ڨلــــب لا تلموني وعلاه
** هـذا حكــم الله فـي جوفـك خبيـه
18 – والمكتـــوب فراقهـــا كيما راد بغاه
** ولـي راه نســاك عـلاه تســال عليه
19 – وصلي علـــى الرسول وستغفر لله
** المكتـوب عليـك لا حـدن يمحيــه
جمال جلالي يوم 2019/02/20
الاحياء و المناطق المذكورة هي في مدينة سعيدة ( العڨبان )
فُلان: اسم الابن
فُلانة : اسم الحبيبة
ليست هناك تعليقات:
إرسال تعليق