وعدنا بين الصهد والمشهاب
الحبيب اللي نخيروه يعادينا
يتقلب ويعود لينا قي عرڨاب
الطلعة مثل الحدورة تحنينا
وايام الاسبوع تتشابه ورتاب
اسكتنا قالو علينا ما فينا؟؟
قالو ذوجياح ماردو بجواب
واحنايا من طبعنا ما يعنينا
تجراح الغدرة على تالي لجناب
من بكري نهدوا الهدرة تخطينا
نتمشوا في وسط لوعار ولعلاب
واذاكركسنا نلوحوا الغبينة
وتتجدد فينا الطاقة والتدراب
كان هدرنا عمرنا ما ردينا؟؟
من سوى بابيات ناضمهم عطاب
خوض الحكمة لا تعجل بالشينة
ياغالط مازال في فمك كُلاب
الڨمنة ماهيش ضحكة و مهينة
ماهي بتشلويش وتولي كساب
هذي صفة في ادخالك وذغينة
تصنعها وتعود بلسانك كذاب
والڨمنة بالجود مغروسة زينة..
والڨمنة من بوك تورثها تتجاب
ظنيتك مولى جمايع تكفينا
هاساعا وليت في تالي لصحاب
مثل العظلم غي بصوتك تسبينا
قي نزوة وتروح من حسك لضهاب
ترجع غير عجاج وتصوط علينا
تردمنا وتعود في التالي، ترّاب
الصحبة ماهيش بافوام حنينة
وفالحزة يعطوك بالمخلب والناب
الصحبة ماهيش فالذات دفينة
ماتحياش ويغلقوا عنها لبواب
الصحبة فالضيق راها تحمينا
نترصوا ونكافحوا بيها لصعاب
يتبع.... قصيدة النصيحة... الشاعر الشيخ بوراس البيض، الجزائر
ليست هناك تعليقات:
إرسال تعليق