خفت ندي سية وسبابها المبخوس
يلومني عارفني وهل دين قربي
وسامعين كلامي سادا خيار نفوس
حذروني عولاما بكلام عربي
وضحولي ايات وحديث مدروس
ڨلت ليهم ذاك سلاحي وبيه ضربي
واللي ظلمني لزم ليه يعود منكوس
نتى سباب بلايا بديت قول المربي
وفيك شعري كل خسارة ياالمنقوس
كل بيت كتبته فيك خسرت تعبي
ومجهود فكري في حقك راه عاد مسيوس
كيلي دفڨته في هاوية مخبي
كان ڨولى طيب وللا بيك مسوس
هنا عرفت الغابي ريحه كان غربي
حين صاط عليا بالكذب جاي مقبوس
وانا ضربته بالريح العاتية تعبي
قاوية بشهيلي فيها الثلج مردوس
نردمك بسافي كان يصوڨ ركبي
نهار يبدا دوري راك تعود محبوس
حين نرفد سيفي بلاك يالغبي
باش ترمي مافيدك لا زناد لاقوس
انا كلامي فيه الحكمة خيار كسبي
ونت كلامك راشي معدن نابته سوس
انا كلامي يبقى فالتاريخ يسبي
على حجار نقشته فوڨ الجبال مرصوص
ونت كلامك مكتوب على فتات طوبي
على مراير طرڨان على تراب مفعوس
انا كلامي من معدن مخدوم ذهبي
مايحيل ولا يرشا فالتاريخ مدسوس
ونت كلامك بنيانه كي ساس ڨٌربي
من الرماد عجنته بين يديك مرفوس
انا كلامي يسوى في الصواڨ يسبي
ونت كلامك مايسواش ڨرام بخوس
هنا عرفت سرار العلم لي مخبي
مابقيتش نضرب بالسيف ذاك قي موس
فالتالية يامجرم ندعيك عند ربي
راه يحضى وجهك بين الناس معبوس
جميع من حڨر يتحڨر فيه يبان طلبي
وجميع من غلب يتغلب رايس عاد مريوس
دنيا صعيبة وبنادم حالو مخبي
اليام تكشف ويبان الغزال مالعتروس
ولد سبع متربع فالغابة الحربي
لنياب هياو المخلب ڨاطعة روس
الكلب 🐕ينبح طول اليل اللا يجبي
مارڨد مايهنى والڨافلة على روس
ركب ساير والمحطة عند ربي
يوم خلص العود من العود مقيوس
اليام تملي العوين شعابها تسربي
والواد يحمل من مجراها يصوڨ مسيوس
نضن هذي تكفي وموفية للوجبي
هذا نديره تحذير يكون ليك دورورس
لوكان نهجي راه يمور فيك ضربي
تعود العيان تڨول عليك ذاك مقروس
الطيب حاكمي
ليست هناك تعليقات:
إرسال تعليق