لما ظهر
ضي القمر
وسط النجوم
قشع الغيوم
خلي الفؤاد الصخر
ينطق بالأمل
********
فين يا قمر
أيام ما كانت كلمتك
أجمل سمه متبسمه
فوق الجباه
عشقنا حبك من زمان
والكون مليته بالأمان
وف لحظه تاهت
غنوتك وسط السحاب
حتي العيون إتكحلت
كحل بتراب
**********
آه يا قمر
ترك المدار
مصلوب فؤاده ع الجدار
معدش ضيك ينده المعاشيق
معدش لحنك يطرب المخاليق
واللي بقي منك
حبات هموم متبعترين
كل حبه وف طريق
صبحت تايه ف الغيوم
وبقيت سجين
والسجن قضبانه أنين
**********
آه يا قمر مخنوق
الأرض صبحت شقوق
دم الضحايا إتعصر
فوق التراب منشوق
إبتدا زمن الوحوش
أسد ٠٠ديابه٠٠هاموش
صمتك ف قلبك طوق
نزفت جراح الحق
عميت عيون الخلق
واللي إتحفر ف القلب
كلمة ندم يادوب
من بعد شق التوب
سلمت للمكتوب
ورفضت لحظات العتاب
أعلنت راية الإنسحاب
وتاويت عيونك
في السحاب
***********
ٱه يا قمر مخنوق
من لحظه كان ضيك
وسط الفضا مفرود
يرقص على طول المدي
والكون مالهش حدود
يملا الحياه بالغنا
والفرحه بتهلل
وف لحظه ضيك يتكسر
أصل الطريق مسدود
***********
قوم يا صلاح الدين
من فوق جبل حطين
صلي على طه الرسول
أصرخ في الخلق قول
ليه القمر مخنوق ؟
ليه القمر مخنوق ؟
************
الشاعر محمد علي فرغلى احمد
معلم خبير بمدرسة أبوتيج الصناعيه العسكريه بنين
ليست هناك تعليقات:
إرسال تعليق