يكفينا من الهدرة زايدة
الكلام لي بلا فايدة
دايرين لحم فوق مايدة
غير حط يدك وقطع
كلام لا ڨمنة لاميزان
الهدرة في فلانة وفلان
التعميد ماهو زلت لسان
كل كلمة تتڨال تترفع
زريعة في أرض حديد
ماتنبت ماتعطي مفيد
غير التعب عليها يزيد
زارعها منها واش يطمع
الجار متڨابل مع الجار
ياكل في لحم الجار
وجار يعاون فيهم بالمنشار
يطرف ليهم بطرف يقطع
متغادرين بالضحكة الصفرة متغالطين بطيب الهدرة
مذوقين بعضهم طيب المرة سلامهم شحال حار ويوجع
هذا حالكم ياشي عباد
حتى نتوما معنيين بالفساد
و للفاسدين عند ربي معاد
يوم الخلائق الكل تتجمع
هذا كلامي عليا يشهد
يا غالطين الله الأحد
في كل خطوة كاين لحد
الحياة مبنية على سوايع
انت يالي بالناس تجمع
فعرضهم وقتك ضايع
روح صلي اسجد و اركع
شيطانك راه فيك يخدع
ماشي طريق معمر شوك
انت والي راهم يسمعوك
علاش تاكل في لحم خوك
قد ماتاكل منو ماتشبع
أوسيف قدور. 2018
ليست هناك تعليقات:
إرسال تعليق