القصيدة بعنوان الثورة
ثورتنا ثورة و صنعوها الثوار
و الحق ديناه ماهوش مزية
ولاد بلادي عولو يقلعو ذا العار
و خرجوا من ارضنا ولاد الرومية
مجموعين اليوم و راح الاستعمار
يدي في يدكم شنانة فالعديا
عندهم ما دارو سلالة الكفار
في ولاد بلادي صبي و بنية
نتفكرو الشهداء و قبورهم تنزار
و ما زالو لي حايين ساكنين حذايا
يحكولنا ما دار ديغول و بيجار
و يحكولنا ما دارو ولاد القومية
ثلث لوان طلع و رانا اليوم حرار
ليكم يا حاضرين سلامي و تحية
لخضر و لبيض و الاحمر اسرار
في قلبي ساكن و الكبدة مشوية
و الي راه غايب وصلولو لخبار
و قولولو الجزاير مازالها حية
و انا من حقي نكتب ذو لشعار
الله يكثر خير من جابو الحرية
بجاه الصالحين و الشهداء لبرار
سالو الونشرسي و جرحرة و لوراس عاشو ذا النار
و سالو الكبار و الثوار من الاصنام حتى لمغنية
و سالو صحبات الحايك و العجار
يحكولك على العمامة و البرنوس و الزربية
سالو المشياخة في لسواق تبراح بالتعبار
و سالهم كيفاش عاشو كل دورية
الجزاير وطني نركعلو بعد القهار
و قد ما نحكي هذا غير شوية
عبد القادر بوجلطية
ليست هناك تعليقات:
إرسال تعليق