كنت سارح في حياتي متهني
واش جابك ليا يا شين القمنة
داروني ظالم و انت من ظلمني
كي الشيطان انت ظهرت الفتنة
قلتلهم مظلوم لا حد اسمعني
وليت كي القصعة ما فيها بنة
ما نضربو لوكان ما هبلني
سال على اصلي يقولولك جنة
اهل الهرانفة كلها يعرفوني
و اليوم طيحتني في ذا الغبينة
وكيلو مولايا بصحتو دخلني
نسلك انشالله من ذا العجنة
قادر مولايا في ساعة يسلكني
كي ريحت دير القصبة و الزرنة
طبل و ارقص و زيد غني
يا الظالم اسمي عندو معنى
ماهوش زيك الي يخوفني
غير تقدرت و جات المحنة
الله الوكيل الي ذاك طيحني
والله لا تشوف الخير و تتهنى
مانقبلو يدور بيا و لا يجاهيني
بكيتني و بكيت ولادي و الكنة
بعد الخير شوف كيفاه قابلني
مول الخير يعثر شوف وين وصلنا
انا الي ماعرفت كيفاه ندني
و ماعرفت كيفاهنذري ذا التبنة
جاهيتك بالرسول روح بعدني
و خليني بلاك منك نتهنى
لوكان طيرلي نعضك بسناني
و نخلي مارة في كل تركينة
احسبني رمضان الدهر و صومني
انت كي الدفة و انا وردة فالجنة
الشاعر عبدالقادر بوجلطية
ليست هناك تعليقات:
إرسال تعليق