( وداعا أمى )
*************
راح السند
كل البشر بتقول أبونا السند
إلا أنا
انا أمى هى اللى فى حياتى كانت سند
كل الكلام دا حاضر بالورق والمستند
كان ليا أم بسيطه جدا
ورده ومرسومه فى ورق
قلبها لون الحليب
اللى يفور ولا يحترق
امى اللى كانت قدوتى
فى الكرم والاهتمام
وفى المحبه وفى السلام
أمى اللى عاشت تتجرح
واستحملت مر الكلام
إحساسها كان باليتم دايما
قلب مجروح بالسهام
أمى كانت لما تحكى
تلقى صبر فى الكلام
كنت لما ليها أشكى
تقولى إثبت مش كلام
كان كلامها لى صريح
الجبل مايهزه ريح
لما يوم رجعت لأمى
روح وردت تانى فيها
فرحه امى كانت حكايه
حاسه إنى مشتريها
عدى عام ومعاه همومه
إلتقيت أمى تقولى
يالا سافر يالابيع
خوف لأبنك يوم يضيع
والكلام المور يابنى
عارفه أد إيه وجيع
طول حياتى لما بزعل
باشتكى للناس أبويه
وأشتكى من أختى وأخويه
إلا أمى
أمى دى مين يشتكيها
والحياه كانت جميله
أصل أمى عايشه فيها
لما كنت أقعد مع أمى
كنا نحكى بالساعات
نحكى ياما حاجات كتيره
حكايات قديمه مش جداد
رغم كل اللى الفرحه ديا
أمى شاطره فى الحداد
لما يجى الحزن بيتنا
تحس إن سنين شداد
فى لحظه تفتكر السنين
تقولى يابنى شوفت ياما
وإتحرمت من الحنين
شوفت ظلم معاه إهانه
من بشر فى قلوبها طين
اللى صبرنى فى زمنها
كونتو نعمه ودا تمنها
يادموع العين كفايا
أمى عزمت عالرحيل
الوداع ياما ياغاليه
كنتى أخر المخلصين
***************
اللهم إرحم إمى وإغفر لها
وإجعل قبرها روضه من رياض الجنه
ليست هناك تعليقات:
إرسال تعليق