*****
مرة فى واحـــد كسر الباب
وقال يا سياد البيت دستور
قلت باين له اليوم ده هباب
تسمح تمشي كده وتغــور
قــام راح تـف رزعنى بكف
خلى الفــك سنيـــن مكسور
وراح متلافي عظم كتــافى
تقولش كلب وكان مسعور
*****
وقال يله اركب خلص يا بنى
الظاهر إنـــك ... واد فـرفور
حلفت بربي مــا ماشي معاك
لو حتى ياجينى ميت مأمـور
خبطنى بـبكس فطيت فالبوكس
شاعركم يومهــا كان معذور
وفضلت ألــف ..وألف معاه
وكأني أنا عجل وكان منذور
*****
ولما وصلت هناك قـال إنزل
وقــفْ ... غنى مع الجمهور
وقفت فى صف طويل معوج
والكل يـــا عينى كان مقهور
ولما سألنى هناك عن إسمى
قلت يا باشا أنـــا المحسور
راح مــدينى ... قلم فى قفاى
رحت عاملها على الكاستور
*****
وفجـأة أخذنى على التخشيبة
بغرفة عجيبة مــا فيهاش نور
ولما سألته .... يا سيدنا البيه
هنا رح أموت قال لى دى شور
قلت خلاصك سيبنى أصوت
عقلي أمبارح كـان مخمور
وأوعدك إني ... أجند نفسي
وتجعل منى عميــل مأجور
*****
قال تسلم لى يا نن عيـونى
أنا دى الوقت بقيت مسرور
كـــل ذنـــــوبك رح نغفرهـا
بس بشــرط تعيش طـرطور
قلت دى أجمل عيشة معاكم
عيشة تخلى الدنيـــــا زهور
عيشة تخلى الناس في بلدنا
تقـول جود نايت أو بونجور
لكن الخوف ... الدم الحامى
من عمايلكو.... عليكو يفور
*****
قال ماتخافش احنأا سيادكو
وياما حكمنا عصور ودهور
بغمزة عين من رمش عيونا
سبــع الليل هيصير عصفور
يــــاما شارينا ذمـم خربانه
كـــان بتفكر ... بكره تثور
ويوم ما الشعب علينا ينهق
ننخزه نخزه بســـن خابور
فجأة الدم الحامي ... اتغير
وقلت الشعـب يغور ويغور
نزلت في نص الشارع أنادى
ينصر دينك .... يا دستور
*****
شعر / حمودة سعيد محمود
الشهير بحمودة المطيري
ليست هناك تعليقات:
إرسال تعليق