ادي ذا المرسول قبل طلوع لفجار
نبعثك لواحد البر طير روح تعلا ليه
راه وحش المحبوب يقدح ب نار
ياذا الطير اسمع كلامي عندك مركيه
حين توصل عندها بشرها بل الخبار
اعطيها ذا المرسول قلها افهمي معانيه
نبعث القمري ل لبلادها طاير شوار
حامل كتبي وكلامي ماهو ناسيه
حين حين وصل القمري قبل نهار
رافد الحاني وكلامي متزاهي بيه
اقرات المرسول بلحانها ياشوطار
وفهمت هذاك الكلام وحتا معانيه
بر المحبوب جاني بعيد ياحضار
هاذ القلب زاد التشطان معييه
نستنا قمرية يجيبلي عليها بشار
ولا كلام حلو مراري يزيد يحليه
ياذا القمري عيدلي معاك ماذا صار
خبرني بكلامها راه قلبي راح لهيه
حكيلي واش حال مسبوغت لشفار
هاذي مدا طايلا محكيتليش عليه
قالي حالها ماهو كي حالك ياحضار
مرض الحب ياويح لي يتبلا بيه
لغواط المعلوم حوستها دار بدار
وعطيتلها مرسولك واش كاتب فيه
ناس الجود والكرم وحتا ناس خيار
يرحبو بضيف ولي باعث ليهم قمريه
قال عليهم قمريا قال وقال التعبار
ونا قتلو حدثني علا غزالي واش منويه
قالي واش نحدث علا زين المسرار
انتا ضلمتو تاخض رايي روح خطيه
محبوبك راه مريض من هدا اضرار
وضر لي سكنو مكاين طبيب يبريه
قتلو ارجع طير تعلالي معا لوعار
وقوللها طيب في حبك لا تلوميه
من وحشك راه أڨدا قلبي ب النار
هاذ المجمر غيرك مكاين حد يطفيه
قوللها قلبي عليك ماهو ذركا صبار
حتا هاذ القلب ياسلطانة ملكتيه
قوللها ذا مهموم راه عليك محتار
ساهر طول الليل ماتغمض عينو فيه
تلقايه قاعد يبكي في قلب الدار
ساهر علا شمعة بكاية ليلو تضويه
هاذا حال الحب مرضنا منو ياحضار
اويا ويح لي عشق وا القلب معاديه
قلبي راه شاطني عليها زادني تحيار
راح القمري معا حمام مساوط جنحيه
رافد من عندي هدا وهدا وهدا خبار
قاصد لغواط جا المكتوب رجعو ليه
الله غالب توحشت مسبوغت لشفار
ياربي يرجع قمريا حامل كلام مزهيه
ويحدثني معاه ثاني اليوم ماذا صار
مرت ايام واسابيع ونا نستنا فيه
وكل يوم نقول غدوا يجيبلي لخبار
لاكن طول في الغيبة شوف لي بيه
هاذ القمري خيرتو حاذق في لطيار
المكان لي تبعثو بلخف يروح ليه
ياقمرية ارجعلي لاتخليني محتار
بعد مرت اشهور وايام جاني منهيه
معمر قلبو بحديث منوع وافكار
حين وصل من لفرحة سلمت عليه
بدالي لحديث يحدث من شاو نهار
وحكالي قال محبوبك لباس بيه
راه زها خاطرو كي قرا هاذو لشعار
عجبو كلامك زاد اليوم مزهيه
قال يسال عليك زين المسرار
متوحش خيالك شاهي ينضر فيه
وصاتني وقالت وصلو ذو لخبار
وحكيلو كل كلامي ها بلاك تنسيه
قلو كلامك راه شفالي كامل لضرار
شكرت القمري وتحياتي نهديها ليه
لولاك ياذا طير ماتحكيلي ماذاصار
الله عليه مزين صوت يرنن لي فيه
قالي لقمري عبر زينها برزن التعبار
محبوبك اعطيني لوصاف عليه
قتلو الزين كي زين غزال لصحار
ولا جدي الريم يامحلاه عينيه
والشعر حرير حرير ناعم فيا مادار
حين يسوطو الريح متضاهر فيه
العينين السود كي ضلام ياذا طيار
عينها حين تنضر فيا قلبي تبريه
الصوت حنين كي صوتك في لوعار
يبري المعلول من لفراش يجبيه
وا العقلية راك عارفها ياذا الشطار
ياك انت من جبتلي كلامها ومعانيه
هاني وصفتهالك لاتكونش محتار
لزرق ولد الحمام صحة وصحة عليه
ذرك نبقيك علا خير ياحاذق لطيار
وطيب من جاب الشعر زين مقفيه
لولا حبها مانضم لكم ذو لشعار
تحية ليك يالي قلبي راكي ملكتيه
وتحية جميع لي قراو ذو الاسطار
تناح طيب
ليست هناك تعليقات:
إرسال تعليق