سيفه يوم الحيف متواجد مسلول
من الخزة يبان عوده في الفزة
وسط ارفاڨته ساجي مكمول
كان ندهته ينصرك ما يستهزة
ذاعول يسلك الخيط المخبول
عند مدة من المحاين رآه ادزة
طال عذبه دار كيما دار الحول
من الحيرة نسى الفتحة والهمزة
والوقت لي مض مايرجع طول
ياڤمري با الله عجل بالفزة
صيفتك باقيك تدي ذالمرسول
سلامي لحباب من خير العزة
رجالة زينين كلامهم معدول
فاضل عني خيرهم وقت الحزة
الله يوطي طريڨهم زينة بسهول
رفاڨة مجهولين فرسان البهزة
من خيرت لبطال شعرا وفحول
عندي ليهم في الڨلب معزة
من بيهم يبرأ جرح لي معلول
ليهم نهدي ذالقوافي مطروزة
لا طالت ليام نصفاهم ونجول
تحفظهم ياخالقي رب العزة
ألف صلاة عليه نختم بيه القول
من تأليف الشاعر عبد الحفيظ كسالي
ليست هناك تعليقات:
إرسال تعليق