وسط الناس/ بقلم الشاعر: عبد الحميد المرسى

.

( وسط الناس )

وسط الناس البايعه الدنيا

كنت بدور ع الأيام

وكان الخوف الساكن فيا

محوط حلمي بالأوهام

وبعد عذاب من غربة روحي

لقيتني بجدف جوه عيونك

وكل اما المح مجدافي ف يدك

كنت العنهم مليون لعنه

والعن أم الضحكه الصفرا ..

الِ رسموها وبدون معنى

بس المعنى الحلو قريته ..

في حروف ردك

يمكن مسألتش أشوفك بكره ؟

بس الإجابه لقيتها في وعدك

كنتِ تقولي ..

مسير الحي يرجع دربه

مسير الورد يفوح بالعطر ..

والمذنب يتوب من ذنبه

ساعتها عرفت ان الذكرى ..

هترجع بكره وفارده دراعها

وتعرف مين كان شاري الفكره

ومين غدرها ومين كان باعها

والنجمه الساقطه من سما حلمي

حارقه قلوبهم

والنقطه السوده غصبٍ عنهم ..

باينه في توبهم

بدرك ياحبيبتى حمامه بيضا عماله تصد

وفوق عمري بتهديني فرحه ودايره تمد

حتى ملامحي لما تشوفيها ، بستان ورد

فاكره القهوه ؟

فاكره طوافك حوالين فجري كده على سهوه ؟

كله هنا وف نفس اللوحه ..

مرسوم حاضن نفس الغنوه

الغنوه ال بناجي حروفها

تحضر بكره ..

ساعة الذكرى

عبدالحميد المرسى