أوفا صديق بكل وقت و كل حين
مخلص إلك و برفقتك كل السنين
بيحكي معك من دون ما تحكي معو
و أيا لغة بيحكيك منها و عن يقين
مثقف ثقافة عالية و عندك رصيد
بالقراءة و الكتب هذا أكيد
و مش هم تقرا او تقلِّد ببغا
لمهم تفهم شو بتقرا و تستفيد
شيخ و طفل مرأة ما بيهم النسب
بكتاب عنوان الثقافة و الأدب
الحكمة .البلاغة. الطب .علم الإجتماع
بحرف ماسي عنهم الكاتب كَتب
المرأة كتاب بشرط تقراها مليح
بتعيش طول العمر هاني و مستريح
لسان البشر فوق الأرض بكتابها
ما تهملو و إقراه بلسان الفصيح
الكتاب نور بيرشدك وقت الظلام
أقصد ظلام العقل من نور العلام
بيعطيك شو ما تطلبو من دون ثمن
عا شرط تعطي للقراءة إهتمام
يمكن إذا أعطيت سرّك أي حدا
يخونك و من بعدها تصيروا عِـدا
و سرّك إذا كتبتو بصفحة من كتاب
بيظل سِـرّك سِر عا طول المدى
الكتب السماوية من الرب العليم
نزلت و تهدي عالصراط المستقيم
و لو ما تثقَّفت بثقافة أي كتاب
بتبقى حياتك كلها جاهل غشيم
الشاعر… د.علي مسلم عجمي
لبنان
ليست هناك تعليقات:
إرسال تعليق