والله يا معين فرج ذا الكربة
لا تجعلنا بين الحيوط ولصفاد
نحسب روحي شاد بيديا حربة
وقت الشدة تكونلي عدة وعتاد
فوق كتافي درتها ليا جعبة
قناصة فيها الذبانة؟؟ وزناد.؟!!
نرمي بيها ع المعاڨل والكعبة
نڨرض بيها كل متعدي صياد
عكازي ونشل بيها في العڨبة
هي ثاني درتها ليا ڨوواد
نمدحها ونواجه عليها ضربة
لاعبها كيما لعبها بن شداد
باني ليها صور عالي عالتربة
متصمصل بانيه ماهر فالتوكاد
حافظها فالعين دايرها ڨبة
كل دقيقة ندير دورة للتفڨاد
مانرضاشي ميزها ارض مقبة
تتبيح مابين واد وواد وواد
راس العنصر نشربو منو شربة
محلاها بنة مرارت بالتشداد
ساعا دار الحال ولقيت اللعبة
نحسبها عذرا وليها خمس ولاد
ماتتزوج بالكواغط ما تعبى
بلهوتية تبدل البر ولعباد؟؟
عشاقة وتمل بالخف وتهبى
تربط عدتها وتكرش فالتزهاد
مثل السوسة في عظامي تتربى
يتهرشم ويسير عولة للتدواد
من فارقها راه ينجى من صعبة
من قربها مكسر الراس ولعضاد
ماهي علة يسلكو منها طبة
ماهي ازمة نرهنوا فيها لعياد
ماهي دين نسدوها بالطلبة
ونساسو واللي بخل فيها جحاد
ماهي سكنى نكبروا فيها رحبة
ونعلو بنيانها فوق العمااااد
ماهي علم نهاجر عليه ونجبى
نتعلم ونيل شهادة وڨراااد
ماهي بنت نخيرو ليها سبة
تتجرح ساعة وتبرى بالتجداد
سالوها قولولها ماكي لبة؟؟
ثعلب عييتي الڨادر في لجياد
عييتي قارون طاح مع صبة
وغريتي فرعون قاعد للتعواد
والنمرود اللي طغى فيك ولبى
ماننسوشي قوم ثمود مع عاد
مادمتيش لحد ما عندك صحبة
خيطي وين يبان راشي ع التنفاد
نفسي والشيطان دارو المحبة
كي يحبس نجعي ادزيه ويتڨاد
ماضيا درتيه لي ناڨة جربة
وسهديتيني فيه بالبڨ والڨراد
حاشا بعض الناس بيهم نتخبى
نستضرا ونحطهم عولة والزاد
اهل الڨمنة وجودهم فينا سربى
يحفظهم ربي العليم الصماد.
والحشلاف الشين كاثر للغتبة
نوفاقة ڨلبوا الراس على الفواد
نطلب ربي خالقي ليه الطلبة
يهدينا للخير ويحنوا لكباد.
والصلاة على النبي زين الوجبة
محمد شفيعنا يوم الميعاد
هذا الشاعر حط شعرو بالغصبة
في ليلة بوجامبر من بوجماد
ارزيقي ماهوش هامل ع الكتبة
اهل النخوة سولو عنهم لجداد
متخضرم في عيشته باغي رهبة
ويخلي عنوة الجرح بلا تكماد
ناس البيض عاونوني يا قربى
راها ناري شاعلة وسط الفؤاد
الشاعر الشيخ بوراس... البيض..
..
ليست هناك تعليقات:
إرسال تعليق