----------
مش شيب هذي نجـوم زارعها
من حَقلِـة الياسمين مَطلعها
بلون الطهارة. بِـيض مصبوغين
و حِسن النوايا و صِدق مَرجَعها
أخذت بياض التلج من صنين
عناقيد لولو عم تجِمِّـعها
فوق راسي فَتَّـح الياسمين
و غطى على الخدين مَدمَعها
الليل بسوادو و عتمة تشارين
بلَّش شعاع الشمس يقلعها
و ضَـوُّت نهارو خيوطها الحلوين
بيضا و بياض الشمس لَـمَّعها
الشيبات هيبة جَمَّعتها سنين
لما شباب العمر ودعها
و عالوح أبيض ناصع التلوين
بريشة شَعَـر رَسمِت مبادِعها
يا شيبة البيضا إلك بتلين
قلوب بيضا الطُّهُر شعشعها
و بورود بيضا زهور عشقانين
نور القمر خَفَّـف مواجعها
و مع طير أبيض غَـرّد بتلحين
أجمل أغاني حُب سَمّعها
يا حلوتي عخدودك النسرين
ورود بيضا صار يشقعها
من بيدري أخذو الصبايا طحين
و من لون شيباتي توابعها
و توب العروس الحامل نياشين
لون شعري نور رَصّعها
شاب الزمان و بعدني للحين
من شيبتي الأشعار مطلعها
(( إلى كل أنثى تجاوزت ال 50 ))
مش بحاجة للعطر تتعطري
و لا تعملي مكياج أو تتسشوري
وقت الشمس و القمر فيكي تظهري
و بين الصبايا بكل جراة تمشوري
كلما كبرتي و زاد عمرك بالسنين
بيزيد فيكي الحلا كلما تكبري
الشاعر… د.علي مسلم عجمي
لبنان
ليست هناك تعليقات:
إرسال تعليق