من دارني حداد ندك حروفي سيوف ؤ خناجر
من دارني صياد على حد الشوف نصيب الوحش لكاسر
من دارني نجار نتقن تطراق لمسامر
ؤ نسد كل فج يجينا منو ريح الكافر
من دارني رسام نرسم للعدو طريق في لبحر ؤ نخليه ينتاحر
من دارني بحار ؤ كلامي مقادف نقطع لبحور ؤ نغامر
بمراكب الصبر نشق لموج ؤ نصد كيد الغادر
من دارني حداد ندك كلامي مقاد ؤ شواقر
باغي نجدب ؤ نتحير باغي نغيب حتى يسيل داك الدم الخاسر
من دارني عطار نخوي دوار ؤ نعمر آخر
من دارني مجدوب نلبس دربالة ؤ بحروفي نهاجر
نتحزم بشريط ؤ على وجه البسيط نعيش مسافر
في عشق الخالق واجب نغامر ؤ مع المخلوق لازم نتباشر
هدا سيح الجروح ؤ هدا جود الخاطر
خلان عبد الكريم
ليست هناك تعليقات:
إرسال تعليق