-----------------------
طفلي يا أمل عمري و منايي
يا فِلذة كَبد روحي يا هنايي
كِـرمالك أنـا ظهري حَنيتو
مش تا عَلِّمك بس القراية
تا يسلم ظهرك بظهري حميتو
من سهام الما بعرف كيف جايي
ضلوعي درع من خلفك بنيتو
و قلت أكتر يا إبني و مش كفاية
الدهر غدّار يا إبني و مشيتو
و ما بدي عيدها معاك الحكاية
يا طفلي يا حبيبي اللي قَسَيتو
بحياتي. يا زغَيـَّر يا ضنـايـي
خلاني بعد كل ال لقيتو
إحميك بجسد حاني بعناية
كل شي بالدِني بعمري جنيتو
وحدك يا إبن بطني جَنـايـي
بجسمي يا طَري جِسمك فَديتو
أنـا الأم الحنونــة بالنهايـة
و قبل ما سراج عمري يجِف زَيتو
و قبل ما تنتهي فصول الرواية
بقدملك كتابي اللي سقيتو
دمي حروف من أوّل صِبـايـي
عمِلِـت ضلعي قلم لما بَريتو
و كتبتلك ألف بـاء الهجاية
و حَميتَك من سهام اللي حكيتو
و عندما تِكبـر تْـمَـرّا و إقـرا
عيوني عملتها لأجلك مـراية
الشاعر د. علي مسلم عجمي
لبنان
ليست هناك تعليقات:
إرسال تعليق