حكيت همومي للبحر لَبَا يسمع
ظنيتو بهموم غيري راه ملان
بعدن راودتو بداني يتوسع
وخبرني بالكاينة يظهر زعفان
راه حكالي على هموم الناس وڨع
ودهشني واضحيت خاطي في الميزان
واحد صار ذليل بعدن كان سبع
وحڨروه وغبنوه سحروه العديان
اوواحد صابر في همومو قي يبلع
ما يشكي مجروح ما حوَّر انسان
اوواحد غايب عالوطن عينو تدمع
ما يحلالو عيش صامطلو LALMANE
اوواحد راح بعييد متمني يرتع
متوحش لبلاد مل LMARICANE
ناس الغربة يا الله ليهم رجَّع
شوق الحومة دار في جوفي نيران
احفظ يا ربي اولاد الوطن اجمع
ويرجع كل غريب في نفسو زهوان
ابقاو على خير قلت انا نرجع
للجزائر طول راه الڨلب ملان
هاذا سلامْ الشوق لبَاقي تسمع
وزعها عالناس ما تنساش فلان
صلو عالرسول بصلاتو يشفع
وبصلاتو انساو يا صحبة لحزان
عبدالقادر طاوي
قصرالشلالة
تيارت
الجزائر
ليست هناك تعليقات:
إرسال تعليق