،سلام عليكم يا لاحباب انفيدكم وفيدوني
نحكيلك على الفايسبوك ولي مخبي فيه
في الفضاء الازرق بعض الناس راهم حيروني
تخلطت الاخبار ولكدوب مع الصح رآها معجنة فيه
صباحيات وامسيات تتسابق ونا بيناتهم علقوني
نرد بملصق ولا بتعبير نعبر على خاطري والي فيه
وتبدأ المنشورات هدا مهموم وايقول لك جرحوني
ولوخر يقص حكاية ويتسنى في ألي يعلق ليه
وكاين الي ينسخ فائدة ويقول منقول لا تحرجوني
وكاين الي من مجموعة لمجموعة يدي منا ويحط من لهيه
وكاين اخبار بلا مصداقية حطوها ومنها حيروني
وتعمت بين الناس بالغلطة وقلب الي جرحوه شكون يداويه
الفايس رآها أمة فيها تتلاقى بطلب الصداقة علقوني
نوافق عليه ولا تخلي الناس عند الباب لا الي يفتح عليه
وكاين ناس تسوطي للخاص بلا دقة وتم يبغو يعرفوني
هدا الناس عندها نية خاصة والمقصود يبلغ فيه
ماتغيضك غير الرجل متخبي بطفلة ويقولك عشقوني
وبصاحبو الي يحكي ليه على أسرارو رآه اليوم يعشق فيه
وكي تزيد لمحبة ايفضحو مع صحابو وايقولهم لا تكذبوني
ويعطيهم فالادلة رآها المحادثة مصورة بالشيء الي صرا فيه
هدا الفايس حيرني والناس ألي فيه حيروني
تلقى الناس متجمعة وكل واحد شڨفتو في يديه
صبحت عادة نتجمعو ولبورطابل فاليد صوروني
حتى الخير أصبح مزمة ديرو وحط منشور عليه
السترة رآها زينة وفالخير كن سباق والى غلطت سمحوني
رآها الغلطة تتصحح قبل ماتروح للقبر تتحط فيه
ونختم كلامي بالسلام والسماح مني يالي نحبكم وتحبوني
والصلاة على الرسول تداوي لقلوب وتوسع الخاطر بلي فيه
#من_كلمات أمير الريشة محمد عوماري
ليست هناك تعليقات:
إرسال تعليق