** الانتخابــات **
01 – يـا مترشــح لاه راك لا تقصب
** شاتي ذ الكرسـي طامع تلحق ليه
02 – طيحات ونوضـات بايت تتقلب
** طلعات وهبطات نبـــــــدها منهيه
03 – طار عليك النوم تخطط وتكتب
** واش نقـول هنا واش نديــر لهيه
04 – انهـارك بطول عـن اهلك غايب
** يا خوفي لا كان فرضك سامح فيه
05 – طالع بمنشـور في صورة تعجب
** عاونوني يا خاوتي ذ الكرسي نديه
06 – تسمـع فيه يقول نوفي ما تطلب
** طامـع فيك انت كاش مـــا تعطيه
07 – من القهوة لسوق مغبون وتاعب
** اتهلا في الصوت راني جيت عليه
08 – لا كونك هانـي بـدل المضرب
** اذا مكتوبـة ليـك لا حـــد ينحيه
09 – غيضاتو لبـلاد من فيهــا ينهب
** هذا حـب كبيــر كلامـي ذا خاطيه
10 – حاشى ولله مـا قلنــــا تكذب
** هـذا وطن عزيز قاع نسالــو فيه
11 – الراجـل من صاحبو ولا يهرب
** بن عمـو منـا وحبيبـــــــو منهيه
12 – كي يصد لهذا بن عمو يغضب
** حاير وين يصد شكون يواسيه
13 – شاتي ذ الغاشي عنو تنتخب
** مـا خمم كيفـاه واش إلـي لاقيه
14 – ورينا من حنتـك مـاذا يعجب
** واذا كتـب الله ذ الكرســـي تديه
15 – يا مترشح لاه شتك متعصب
** وين إلي سبقـك باقـي لا ماضيه
16–كي نشوف لحالك نبقى مستعجب
** يا دارا ذ الكرســي ماذا كايـن فيه
17 –لؤلؤ و المرجان مرصوص مذهب
** ولا غيـر حديــد والشــوك مغطيه
18 – ولا فرش حريـر فوقـو تتقلب
** ولا مجمر نار لي جالــــس تكويه
19–سواقي م لعسل القلب وواش يحب
** ولا مـر الحنظــل لشــارب تسقيه
20 – خبرنـي كيفاه رانــي مستغرب
** يا هذا الكرسي اشكون لي ترضيه
21 – مانيش اننـم ولا راني نغتب
** هذا الشي معروف قليل لي خاطيه
22 – مانيشي نفتي ولا راني نكذب
** العبـد اذا تاب تاب الله عليه
23 –ماينساش حساب غدوة عند الرب
** المسؤولية تكليف لا تشريفَ فيه
24 – سنة الحبيب ادوانا و الطب
** نختـم هـذا القـول بالصلاة عليه
نسر الصحراء جمال جلالي : 2021/11/11
ليست هناك تعليقات:
إرسال تعليق