عن عيوني
اسير على ضي عيونك
وان تاه مني طريقي
يبقى طريقك
هو طريقي
وان ضاقت بي دنيتي
النظرة ليكي جنتي
......
يا شايله الهم
من بدري
انا شايف فيكي عمري
والدمع لو سال من عيونك
انا عارف ان غصب عنك
منا عارف مدى صبرك
وعارف لما داري جرحك
وعارف لما ترسمي
على الشفايف ضحكة
وجواكى جبل حزن متخبي
عارف يا شايلة الهم بزيادة
وعمرك ما اشتكيتي حزنك
حتى لما المرض سكنك
كانت مشيتك قدامي شامخة
ولما كنت بسألك ايه فيكى
كنتي بتقولي ياولد
أنا شباب عنك
عايز العشا ولا احكيلك
اليوم عن الغيط وثمره
ولا جارتنا ام محمود
لما جت وشربت معانا القهوه
وأم حنان عزمتنا اليوم على العشا
احكي كمان يا غالية
ونسيني الألم ألي في نظرتك
يعني مش عارف يا امي شكوتك
انا حتة منك وعارف
حتى من غير ما شوفك خطوتك
وعارف انك مريضة
ومدارية لوعتك
وان كنت عايش على محبتك
ودلوقتى عايش بدعوتك
محمود خلاف
جمهورية مصر العربية
ليست هناك تعليقات:
إرسال تعليق