عبدالله رجب ابوعدنان
الشتا هجم
كحة و وجع وألم
وحاجات كتير زي العدم
حتى الأمل مستخبي ومكسوف
ضيقة نفس ف البدن
دخان الشيشة شجن
جسد اصابه التعب و الوهن
وقلبي مخطوف
الدخان عبى المكان
على أخطائي ندمان
يا نفسي ايه الحكايه
ردت وكأنها مكسورة
خجلان مانت إنسان
خطفت نفسي من زماني
قولت أغير مكاني
يمكن أنسى أحزاني
ع القهوة لقيت كرسي فاضي
ف آخر الصفوف
طلبت شاي من غير سكر
اتاري نفسي من جوايا بتتحسر
لا أخ ولا إبن وبنت
للدرجه دي هنت
انا عمري ما بعت أو خنت
وف بلدي ما بتقدر
يا خسارة عصارة الحروف
شربت حجر قص
زادت ضيقة النفس
كل اللي حبتهم ولا واحد
بوجعي و ألمي حس
واخدت نفس ورا التاني
والدخان يعبي المكان
بشكل مخيف
وقعت ع الأرض
مش م المرض
ولا ديون أو قرض
واللي سندني غريب
لكن قلبه طيب
فعلا دوا وطبيب
عرفت لما صحيت إن إسمه
عمل المعروف
دخلت عتبه البيت طوالي
مراتي كاتبة لستة بسرعة حضرهالي
عرفت ساعتها الرخيص من الغالي
وأهم حاجه المصروف
كلهم زهقو من كلام الشعر
أعمل ايه انا غشيم ف الحساب و الجبر
عمري كله قضيته مابين صبر و مر
رجعت ع القهوة لقيت
اللي سندني بيحضن فيا
وبيشكر الظروف.
ضيقة نفس.
عبدالله رجب ابوعدنان
ليست هناك تعليقات:
إرسال تعليق