طاب جناني ما بقا لي ما يتحب...شاب الراس وشاب قلبي ممحاني
ماني قادر لا نقول ولا نكتب....اذهب عني القول واثقل لساني
قاعد بين لسان وقلم معذب....والورقة داها الريح وهناني
ما نكتب ما نقول وما نبقى نحسب....شوفو لي حفرة وزيدو لكفاني
فشلو لي لعضاد ما قادر نهرب....واجهل موج اغرامها راه اداني
تكدر غيمي وغمني ما جاب الصب....ما طلعت شمسي ولا نجم اهداني
كنت انا وياه زوج عقول وقلب ...اهجرني ماعاد قلبو يهواني
وتبرم عقارها سد المشرب....وانشف ريقي فالهو ما رواني
ما نفعوني لا شيوخ اصحاب الطب ...ما طاقو لدواه ضري دخلاني
اتمعن في حالتي لا تتعجب...ولا تستهزا تقول في حقي داني
حالي حال كثير فالدنيا يتعب....ويستنا فالكاتبة ملفوقاني
عاش حياتو فالمحاين يجرب....ما شكك في رزق ماغرو فاني
الدنيا واحوالها كي تتقلب....مرة لول فالبلا مرا ثاني
تعمل منك راحلة هي تركب...وشي مرات تدير منك سلطاني
هذي احوال الفانية ماني نكذب....ها فيدوني برايكم يا لخواني
صلو وسلمو على سيد العرب ...والصلاة عليه طه العدناني
جلول قيايدة
ليست هناك تعليقات:
إرسال تعليق