سلام عليكم ورحمة الله
عنوان القصيدة..جميلة..
1-ياريم لريام غيابك راه طول
ماظنيت قلبك هكذا يجفاني هاجميلة
2-بلا سبة نكرتي العشرى وحالك تبدل
مصعب فراقك وطريڨك شحالها طويلة
3-أنڨطعت خبارك وڨلبك عليا جفل
بسبابك محتار نوصلك ماعندي وْسيلة
4-بيني وبينك بحور زهري تعطل
حامل مالهموم هموم ياسرة ثقيلة
5-كثر تشغابي مضرار متوحل
نوم هجرني منك حالتي عْليلة
6-شوقك في جوفي نارو ڨادية مشعل
عديت ماليالي ليلة بألف ليلة
7-ضاقت بيا لحوال حالي مهول
متحصر و مغياض أحضوضي قليلة
8-سامح في شغالي و رايي تشرتل
كثر تشطاني لسلاك ماجبرت سبيلا
9-غرامك قيدني في قيودي مكبل
مڨواني نتمحن فا لمناظر ذْهيلة
10-سبحان خالقي فيك لوصاف جممل
الرڨبة عنقا صافية والعين عسيلة
11-تباني وردة محروسة في مشتل
عطورك فاتت عطور وردة الخميلة
12-عينيك حد الخنجر للڨلب وصل
راهم هلكوني أجروحي نازفة هطيلة
13-ذبحوني شفار عينيك ضروس منجل
زينة طبايع ف العقلية ڨليلة
14-حوجبك هلال مڨواها العين تشهل
يهواك القلب في خلايقك نبيلة
15-فمك خاتم وخدودك شهد عسل
من كاس شوقك هيهات ها جميلة
16-زينك هزمني معزول في معزل
في بحرك تايه وحالتي هزيلة
17-باقي ساهي و العقل رحل
همومك كثرت و فاضت م الممكيلة
18-حبك صال ڨلبي منك مايملل
حبك عماااني عيني ولات ككليلة
19-لغربة والشوق في صورتك نتأمل
ياريم لريام زينك مالوش مثيلة
20-ريت ڨلبك شوية يحن و يتعقل
م الوجاب وجبي كوني سْْهيلة
21-حبي ليك م صْميم مانيشي نمثل
ما لعزْ نهديك حياتي طيلة
22-هديني ڨلبك و نهديك جوارحي كامل
بحبك نفخر ليا ماهوش تبهديلة
23- ما نخطيك حتى نصير فوڨ محمل
وذرعتيك شواهدي حلالي خليلة
24-كتبي أحمد الشلف صيل مأصل
مايغويني الراشي ولا ثوب الروتيلة
بقلم أحــمــد مـداح قلـم التـل
ليست هناك تعليقات:
إرسال تعليق