** يَــــــا مَرْسُولِـــــي **
01 – غَرَدْلِي يَــــا طَيْـــرْ واعْـــزَفْ عَ لَوْتَارْ
** وَانْشَـدْ لِـي نَغْمَـاتْ خَطْـرُوا فِـي بَالِي
02 – ذَاقَـــتْ لِـــي لَحْــوَالْ وَﭬَلْبِــي مَحْتَارْ
** مَتْشَهِـــــي رَنَـــــاتْ تَشْفِــــي لَعْلَالِي
03 – يَـــا مَرْسُولِـــي طِيــرْ وْسَمَـعْ الحُظَارْ
** وْلَّحَـــنْ لِـــي كَلْمَـــــاتْ غَنِـــي مَوَالِي
04 – مَـــوَالْ المَلْحُـــونْ يَشْفِيلِـــــي لَضْرَارْ
** يْنَشَفْلِــي دَمْعَـــــاتْ تَتْبَـــدَلْ احْوَالِي
05 – يَـــا مَرْسُولِــي طِيــرْ وْسِيرْ مْعَ لَطْيَارْ
** زَوْرَة لَمْرَحَـــــــــاتْ خَفَـــــــفْ اثْقَالِي
06 – ﭬَلْبِـــي مَتْشَـــــوَقْ طَفِيلِــــــي ذَ النَارْ
** نَتْخَلْـــوَضْ سَعَــــاتْ تَهْــــدَفْ اﭬْبَالِي
07 – يَـــــــا مَرْسُولِي طِيرْ وَاعْلاَ فِي لَوْكَارْ
** وْغَنِيلِـــي آَهَــــاتْ عَشْقِـــــي وَهْبَالِي
08 – وْسَمَعْلِـــــي لَحْبَـــــابْ وَوْصَلْهُمْ بَشَارْ
** وْسَـالْ عْلَـى السَـدَاتْ مَرْحَبْ بَسْوَالِي
09 – يَــــــا مَرْسُولِـي طِيرْ وْطِيرْ مْعَ لَفْجَارْ
** مَتْوَحَــشْ ﭬَـعْــدَاتْ صَحْــــرَا وَرْمَالِي
10 – وْصَيْــــدْ الغُــــزْلَانْ كُدْرِيَــــــة وَحْبَارْ
** بَــــــارُودْ العَلْفَــــاتْ ثَـﭬَــــبْ مَشْعَالِي
11 – يَـــا مَرْسُولِــي طِيــــرْ ﭬَلْبِـي عَّ لَجْمَارْ
** شَاهِيلِــي نَظْــــرَاتْ فُرْسَــــانْ اتْشَالْي
12 – وْمَشْـــوِي عَّ لَعْمُــــودْ يَتْصَهَدْ عَّ النَارْ
** مَلْفُــوفْ عَّ الجَمْــرَاتْ رْوَايَـحْ تَحْلَالِي
13 – يَــــا مَرْسُولِــــي طِيــــرْ مَتَعْلِي لَنْظَارْ
** نَظْــرَة فِّـــي السَــدَاتْ نْرَيَحْ مَنْ بَالِي
14 – مْسَلَـــمْ لَصُـــــلاَحْ سَدَاتِـــــــي لَخْيَارْ
** أَهْـــــلْ الكَرَمَـــاتْ يَرْضُــو عَـنْ حَالِي
15 – يَـــا مَرْسُولِــــي طِيــــرْ غَنِيلِي لَشْعَارْ
** لِلْـﭬَصْبَـــــــة جَـــــــرَاتْ أَوْزَنْ مَقَالِي
16 – حَـــوَسْ يَــــا ﭬَصَابْ انَــا بِيَا مَا صَارْ
** وَيْــنْ رَاهُـمْ سَهْــرَاتْ وَشْيُــوخْ لْيَالِي
17 – يَـــا مَرْسُولِــــــي لَاهْ طَوَلْتْ المَشْوَارْ
** طَلَــــــة مَـــنْ طَــلَّاتْ جَـاوَبْ سُؤَالِي
18 – جَيَهْتَــــكْ بَـــــــالله كُـــــلْ لَيْلَة وَنْهَارْ
** اَحْيِيــــــــــلِي عَـدَاتْ نَمْـــدَحْ ابْطَالِي
19 – يَـــا مَرْسولِــــي عِيدْ واعْطِينِي لَخْبَارْ
** نَخْتَــمْ ذِي لَبْيَـــــاتْ لَــــــــوَلْ بَالتَالِي
20 – غَرَدْلِي يَــــا طَيْـــرْ واعْـــزَفْ عَ لَوْتَارْ
** وَانْشَـدْ لِـي نَغْمَـاتْ خَطْـرُوا فِي بَالِي
بلبل الصحراء جمال جلالي يوم : 2020/12/25
ليست هناك تعليقات:
إرسال تعليق