ربيت طير صغير بين ليلة و نهار
ارقد في حضني و بكيت بالدمعة
نحكي قصتو اسمعوني يا حضار
في حياتو لا شاف لا شعل الشمعة
مزرقط كل لوان ما هو كي لطيار
ما ينفع لا يضر طالب النعمة
اسالتو منين جيت يا مكحل لشفار
قالي سامحني سؤالك غمة
استغفرت الله مولايا القهار
عايش في لهموم و الدنيا ظلمة
افتحلي قلبو و خرج كل اسرار
و على امو يبكي و طالب الرحمة
قتلو صارحني لا تكونشي نكار
ما هو مستحيل نعاودو ذا اللمة
انيا ثاني مكوي شابع كل مرار
و انتايا مثلي جينا على كلمة
الريش فيه حلال راه مكوي بجمار
و اشرب من فمي و عنق بالذمة
صارحتو بالصح كنت معاه خيار
و الكذب معاديه ما خدمتو خدمة
انايا قمري ما نيش كيفهم غدار
و اسمع لكلامي و بعد الندمة
رايح يودع بشرتو تبشار
نقصدك و نجيكلو للعاصمة
عينو شفتها بكات و تبدلو لشفار
ذا الشي كان صحيح في يوم الجمعة
رانا نتلقاو اذا طالت لعمار
نديرك في بالي و نختمك ختمة
حتى في كلامي نسطرلك شعار
نخبيلك سرك مكتوم الكتمة
على الصباح بكري ما شفتو كي طار
متوجه لبعيد يبعث فالسلمة
راه تغير طيري بين ليلة و نهار
يا مفسر الكلام يا عالي الفهمة
هاذي حكايتي يا مكوي بالنار
حتى من فمي طاحت اللقمة
............الشاعر عبدالقادر بوجلطية.......
ليست هناك تعليقات:
إرسال تعليق