انسل عظمي من الجلود واضلوعي طاحو ...من كثرة الهموم ونهارات طوال
ماعيّط ضيف فالجوار وكلابي نبحو...ما زاروني احباب لامن عني سال
راني مشتاق ضيف عيني تلمحو...نحكي لو واش صار واهمومي تنزال
ماني قنباس للكلام ماني مداحو...ماني خياط للحكايم لا فصًال
ماني تباع من تخلاو عني وراحو... نفسي ما هو رخيس ما جابو دلال
اقرينا كر الرجال منو نقباحو.... ما تخرجشي الرادينة مني موحال
سيفي مسنون حاد يفضح اجراجو...داير عيطا نقارهازم بيه ابطال
لا تحقرني بعين وتقول اتلاحو...لا تفهم قول مني ذا تذلال
انا اصلي ابطال بجنود وساحو....سال التاريخ سال فالتاريخ ارجال
ازهو يا الزايخات عني وافرحو...الدف معا الهز تنقار الخلخال
عيدوني يا حباب قلبي وارواحو....وابكو ضيمي يا اللي راكم فالبال
اغزال الريم فالفوافي يسرحو.... والعنزي عايش الهنا من فوق اجبال
شايف مولا العز كي حط اسلاحو....واتبناوه سافلين كي لسلاق اطوال
دمروها ناسيين للواد وراحو ...ايس من تسقامها ايس محال
طال الضر وزاد هلكت اجراحو...من ذا المحنة دم بعيوني هوطال
راح العز مع الرجال و قراحو...ولاو الفاسقين في ذاالبر ابطال
يفرحوا للرجال كي سمعوا طاحو...ويفرحو يوم كان يظهرو لنذال
ماني عارف نص ليلي مصباحو...شايف كم مرخيس حاقر كم رجال
افتح لييا الله بابك نرتاحو...سهل رحلي قبل ما يظلام الحال
جلول قيايدة.
ليست هناك تعليقات:
إرسال تعليق